Lesendur Flugufrétta (flugur.is), máttu lesa um ferð Ragnars Hólm og veiðifélaga sem opnuðu Svartá í ár, í kuldunum 2. og 3. júní. Þrátt fyrir að veðrið hefði átt að draga úr tökugleði urriðans, lönduðu þeir engu að síður 15 fiskum og eins og kemur fram í frásögninni, þá voru þeir vænir. Sá stærsti 63 cm. Fengust þeir víða í ánni.
Hér má lesa, á vef Veiðimálastofnunar, skýrslu sérfræðinga stofnunarinnar um stofna Svartár í Skagafirði.
http://www.veidimal.is/default.asp?sid_id=23836&tre_rod=&tId=15&meira=1&sky_id=15570
Reykjafoss á mörkum veiðisvæðanna Svartár og Húseyjakvíslar. Horft suður upp eftir Svartá, eftir laxastiganum sem byggður var snemma á áttunda áratugnum en aldrei virkaði eins og ætlað var.
Vaðið að neðstu veiðistöðum í Svartá, fyrir ofan Reykjafoss. Fjöllin í austanverðum Skagafirði í fjarska.
Pattaralegur urriði, um 55 cm langur, sem veiddist á 3. svæði. Ljósmynd: Birgir Snæbjörn Birgisson
Á neðsta hluta Svartár hægist nokkuð á rennslinu. Sumsstaðar hefur grjót verið sett á bakka til að verjast landbroti og þar hafa myndast falegir hylir og strengir.
Veitt í einni beygjunni niður af bænum Reykjavöllum, sem er í baksýn.
Kastað fyrir neðan Reyki, Steinsstaðaskóli í baksýn.
Urriði tekur í “heita pottinum”, fallegum hyl við bæinn Reyki þar sem heitt vatn seitlar út í strauminn.
Rúmlega 30 cm urriði hefur fengið slöngumerki við bakuggann og er á leið út í ána aftur. “Kápan” á þessum smærri fiskum, björt og með svörtum og rauðum dröfnum, er einstaklega falleg.
Horft af brúnni við Steinsstaðaskóla, norður í átt að Reykjum og niður eftir fyrsta svæði.
Þessi veiðilegi staður er við tjaldstæðið á Bakkaflöt, á öðru svæði Svartár.
Við ármót Svartár og Mælifelsár á öðru svæði. Horft til norðurs.
Nærri bænum Hvíteyrum, á öðru svæði Svartár, kvíslast áin nokkuð við ármót Mælifellsár og hafa menn víða fundið fiska á því svæði. Mælifell í baksýn.
Veiðilegur strengur, skammt frá Starrastöðum. Horft norður dalinn.
Fallegur urriði sem veiddist á þriðja svæði árinnar, undir haust.
Í þverám og lækjum sem renna í Svartá má sumsstaðar finna fiska.
Kastað fyrir urriða skammt fyrir ofan brúna heim að Gilhaga á efsta svæði árinnar.
Vænn urriði þreyttur á efsta svæðinu í Svartá, í gilinu ofan við Gilhaga.
Fallegur fiskur, á sjötta tug sentimetra, kominn á land og mældur á efsta svæði Svartár.
Í gilingu ofarlega á fjórða svæði. Þar eru fallegir kletta og klappahylir og fellur áin víða hratt á milli þeirra.
Ljósmyndir: Einar Falur Ingólfsson & Sigurður Árni Sigurðsson. © 2010
Krókseyrarhylur í Svartá í Húnavatnssýslu. Við sjám ekki mikið af veiðistaðnum, sem er einn af þeim bestu í Svartá, en þarna er ég með eftirminnilegan fisk, 82 cm hrygnu sem ég fékk þarna á míkrókeilu alveg neðst í hylnum, þar sem rennslið hafði nánast stöðvast.
Martin vinur minn vildi komast í meiri veiði eftir vatnsleysið í Flekkunni í júlílok og keypti tvær vaktir í Svartá. “Gætið að því íKrókseyrarhyl,” sagði sölumaðurinn, “að efst í hylnum, í strengnum, liggur nýgenginn fiskur, svo kemur kafli sem virðist ekki halda fiski, en alveg neðst, upp við grasbakkann, þar er hola og þar liggja vænir laxar allt sumarið.” Ég mundi þessa ráðleggingu og þar tók þessi, á dauðarekinu…
Ljósmynd: Martin Bell
Hér erum við í Laxapolli í Fitjá. Þar hef ég tvisvar kastað og í bæði skiptin fengið lax. Ég setti nefnilega í þennan og eins og hlýðin fyrirsæta tók Þorsteinn Joð við stönginni og fékk að glíma við sprækan laxinn meðan ég myndaði. Þetta er langur og fallegur veiðistaður, og góður þegar vindurinn blæs hressilega eins og í þetta skiptið.
Víðihólmi á silungasvæði Vatnsdalsár. Við félaganir tölum um fenjaveiðar og fyrir augum leiftra myndbrot af mönnum öslandi um fenjasvæði Lousiana. En í þessum fenjum höfum við lent í ævintýrum og þarna er Þorsteinn Joð staddur í einu miðju. Dagurinn er 14. ágúst sumarið 2010 og þessi lax náðist á land – sem er alls ekki alltaf raunin á þessum stað. Báðir sluppu; laxinum var sleppt og Þorsteinn náði að ösla í land – það flæddi reyndar ofan í vöðlurnar í leiðinni…
Hvað getur maður sagt? Mjóhylur í Víðidalsá. 98 cm hængur sem tók rauða Frances-keilu. Þung taka og þvílíkur kraftur. Veiðistaðurinn lætur lítið yfir sér, veiðimenn munu frekar eyða tíma í Ármótunum aðeins neðar. En Mjóhylur gleymist ekki svo glatt…
Ljósmynd: Þorsteinn Joð Vilhjálmsson
Veiðistaðirnir gerast vart fallegri en þetta. Litlumýrarhylur í Brunná, þarna undir kjarrinu, skammt frá Laufeyjarlundi. Og þetta er ekki bara fallegur staður, hann getur einnig verið afskaplega gjöfull. Enginn sem ég þekki veit meira um það en Þorsteinn Joð… Einn morguninn var ég ennþá að hnýta tauminn á línuna þegar hann var búinn að landa þremur bleikjum í Litlumýrarhyl, og allar tóku Krókinn. Þær voru líka allar 52 cm ef ég man rétt…
Hér kastar Ingibjörg á bleikjutorfu í júlí sumarið 2010…
Hnausastrengur í Vatnsdalsá á sólbjörtum degi. Einu sinni var ég svo lánsamur að koma þar fyrstur að, snemma að morgni, gekk niður grjótgarðinn og byrjaði að kasta. Ég hef aldre sett í jafn stóran lax og tók þar svarta Frances númer 12, klukkan 8.13. Hann sleit sig lausan 15 mínútum seinna. Þá var ég kominn lengst út á dauða vatnið og nær öll undirlínan farin af hjólinu….
